کرپشن کے خلاف مؤثر کارروائی کے لیے شکایت کا نظام استعمال کرنا ہوگا، ڈپٹی کمشنر
اسلام آباد (سٹی رپورٹر) ایف بی آر کی ڈپٹی کمشنر اقراء شوکت نے کہا ہے کہ ٹیکس دہندگان کی سہولت کے لیے ٹیکس آسان ایپ متعارف کرائی گئی ہے، جس کے ذریعے شہری اور تاجر اپنا ڈیٹا خود آسانی سے درج اور اپ ڈیٹ کر سکتے ہیں۔ ٹیکس سے متعلق آگاہی اور سہولیات کے حوالے سے نیشنل پریس کلب اسلام آباد میں منعقدہ نشست میں سیکرٹری نیشنل پریس کلب ڈاکٹر فرقان راؤ سمیت صحافیوں نے شرکت کی۔ڈپٹی کمشنر اقراء شوکت نے کہا کہ ٹیکس آسان ایپ کا مقصد ٹیکس دہندگان کے لیے ٹیکس سے متعلق امور کو مزید آسان اور سہل بنانا ہے۔ اگر کوئی شخص سیکرٹریٹ پرسن، تاجر یا کسی دوسرے شعبے سے وابستہ ہے تو وہ ایپ کے ذریعے اپنا ڈیٹا آسانی سے ان پٹ کر سکتا ہے۔ انہوں نے کہا کہ فائلرز اس سہولت سے فائدہ اٹھاتے ہوئے اپنے متعلقہ ٹیکس ریکارڈ اور دستاویزات کو بھی منظم انداز میں استعمال کرسکتے ہیں۔اقراء شوکت نے کہا کہ ٹیکس آسان ایپ سے فائدہ اٹھانے کے لیے شہریوں کو اپنا ڈیٹا فراہم کرنا ہوگا۔ انہوں نے کہا کہ اگر کسی ٹیکس دہندہ کو کوئی مسئلہ درپیش ہو یا کسی اہلکار کی جانب سے غیر قانونی مطالبہ کیا جائے تو خاموش رہنے کے بجائے متعلقہ فورم پر شکایت درج کرانی چاہیے۔انہوں نے کہا کہ کرپشن کے خاتمے کے لیے شہریوں کا تعاون بھی ضروری ہے، کیونکہ اگر کوئی اہلکار غیر قانونی طور پر رقم کا مطالبہ کرتا ہے تو متاثرہ شخص کو متعلقہ شکایتی نمبر پر اطلاع دینی چاہیے تاکہ کارروائی عمل میں لائی جاسکے۔ ان کا کہنا تھا کہ کرپشن کے خلاف مؤثر کارروائی کے لیے شکایت کا نظام استعمال کرنا ہوگا۔ڈپٹی کمشنر اقراء شوکت نے شرکاء کے مختلف سوالات کے جوابات بھی دئیے اور ٹیکس آسان ایپ کے استعمال، ڈیٹا کے اندراج، فائلنگ اور شکایات کے طریقہ کار کے حوالے سے آگاہ کیا۔اس موقع پر صدر نیشنل پریس کلب عبدالرزاق سیال اور سیکرٹری ڈاکٹر فرقان راؤ نے ایف بی آر حکام کا شکریہ ادا کرتے ہوئے کہا کہ عام طور پر ایف بی آر کا نام سنتے ہی لوگوں میں خوف پیدا ہوجاتا ہے، تاہم انہیں ذاتی طور پر ایف بی آر سے نقصان کے بجائے فائدہ ہی ہوا ہے۔ پہلے ٹیکس ریٹرن یا دیگر معاملات کے لیے لوگ وکیل تلاش کرتے تھے کہ ان کا کیس کون فائل کرے گا، لیکن اگر ٹیکس کا عمل آسان بنایا جا رہا ہے تو یہ خوش آئند اقدام ہے۔