فوری علاج کے بعد بحالی اور فزیوتھراپی بھی ناگزیر ہے،ڈاکٹر یاسر محمود ملک
متوازن غذا، باقاعدہ ورزش اور صحت مند طرزِ زندگی اپنانے کی ضرورت ہے، ڈاکٹر ولید شہزاد
اسلام آباد (سٹی رپورٹر) طبی ماہرین نے کہا ہے کہ فالج ایک سنگین بیماری ہے جس سے نہ صرف مریض بلکہ اس کا پورا خاندان متاثر ہوتا ہے، تاہم بروقت تشخیص، فوری طبی امداد اور جدید علاج کے ذریعے معذوری اور اموات کے خطرات کم کیے جا سکتے ہیں۔فالج کے تقریباً 80 فیصد کیسز سے بچاؤ ممکن ہے، جس کے لیے بلڈ پریشر، شوگر اور کولیسٹرول کو قابو میں رکھنے، متوازن غذا، باقاعدہ ورزش اور صحت مند طرزِ زندگی اپنانے کی ضرورت ہے۔فالج سے متعلق آگاہی کے حوالے سے نیشنل پریس کلب اسلام آباد میں پریس کانفرنس کرتے ہوئےڈاکٹر حسنین ہاشم،ڈاکٹر یاسر محمود ملک اور ڈاکٹر ولید شہزادنے کہا کہ فالج کی علامات ظاہر ہونے کے بعد مریض کو فوری طور پر ایسے اسپتال منتقل کرنا ضروری ہے جہاں اسٹروک کے علاج کی سہولت موجود ہو۔ دماغی شریان میں خون کا لوتھڑا بننے کی صورت میں بعض مریضوں کو ساڑھے چار گھنٹے کے اندر مخصوص انجیکشن کے ذریعے علاج فراہم کیا جا سکتا ہے، جبکہ منتخب مریضوں میں مکینیکل تھرومبیکٹومی کے ذریعے لوتھڑا نکالنے کا طریقہ بھی استعمال کیا جاتا ہے۔ماہرین نے کہا کہ فالج کا علاج صرف انجیکشن لگانے یا خون کا لوتھڑا نکالنے تک محدود نہیں، بلکہ مریض کو دوبارہ اپنے پاؤں پر کھڑا کرنے اور روزمرہ زندگی کے معمولات کی طرف واپس لانے کے لیے طویل مدتی بحالی، فزیوتھراپی، اسپیچ تھراپی اور دیگر طبی سہولیات بھی انتہائی اہم ہیں۔ بعض مریضوں کو بولنے، چلنے، نگلنے اور جسمانی حرکات میں مشکلات کا سامنا کرنا پڑتا ہے، جن کے لیے ماہرین کی نگرانی میں مسلسل علاج اور بحالی کی ضرورت ہوتی ہے۔انہوں نے کہا کہ فالج کے مریضوں کی دیکھ بھال میں اہلِ خانہ کا کردار بھی اہم ہے۔ مریض کی پوزیشن باقاعدگی سے تبدیل کرنا، بیڈ سورز سے بچاؤ، سینے اور پیشاب کی نالی کے انفیکشن سے حفاظت اور نگلنے میں دشواری کی صورت میں مناسب طبی رہنمائی فراہم کرنا ضروری ہے۔ ان احتیاطی تدابیر کو نظرانداز کرنے سے مریض کی پیچیدگیاں بڑھ سکتی ہیں اور صحت یابی میں زیادہ وقت لگ سکتا ہے۔ماہرین صحت نے زور دیا کہ فالج کی ابتدائی علامات سے متعلق عوامی آگاہی بڑھائی جائے۔ چہرے کا ایک طرف ٹیڑھا ہو جانا، بازو یا ٹانگ میں اچانک کمزوری اور بولنے میں دشواری فالج کی اہم علامات ہیں۔ ایسی صورت میں مریض کو فوری طور پر ایمرجنسی طبی امداد فراہم کی جائے اور وقت ضائع کیے بغیر متعلقہ اسٹروک سینٹر منتقل کیا جائے۔ انہوں نے کہا کہ مریض کو پہلے غیر متعلقہ مراکز پر لے جانے یا علامات کو معمولی سمجھ کر انتظار کرنے سے علاج کے لیے دستیاب قیمتی وقت ضائع ہو سکتا ہے۔سیمینار میں بتایا گیا کہ پاکستان میں فالج کے مریضوں کی تعداد اور اس سے ہونے والی اموات کے حوالے سے جامع قومی اعداد و شمار محدود ہیں۔ تاہم دستیاب تخمینوں کے مطابق ملک میں ہر سال تقریباً ساڑھے تین سے ساڑھے چار لاکھ افراد فالج سے متاثر ہوتے ہیں، جبکہ اس بیماری کے باعث بڑی تعداد میں اموات اور مستقل معذوری کے واقعات سامنے آتے ہیں۔ ماہرین نے کہا کہ فالج دنیا بھر میں اموات اور معذوری کی بڑی وجوہات میں شامل ہے، اس لیے اس کی روک تھام اور بروقت علاج کو قومی صحت کی ترجیحات میں شامل کرنا ضروری ہے۔انہوں نے کہا کہ فالج سے بچاؤ کے لیے ذیابیطس اور ہائی بلڈ پریشر کے مریضوں کو باقاعدگی سے اپنا طبی معائنہ کروانا چاہیے اور ڈاکٹر کی ہدایت کے مطابق ادویات استعمال کرنی چاہئیں۔ بلڈ پریشر، خون میں شوگر اور کولیسٹرول کی سطح کو قابو میں رکھنے کے ساتھ وزن میں کمی، روزانہ جسمانی سرگرمی اور متوازن غذا دل اور دماغ کی شریانوں سے متعلق بیماریوں کے خطرات کم کرنے میں مددگار ثابت ہوتی ہے۔ سگریٹ نوشی سے اجتناب اور غیر صحت مند طرزِ زندگی ترک کرنا بھی ضروری ہے۔طبی ماہرین نے کہا کہ فالج کے مریضوں کے بہتر علاج کے لیے صرف نیورولوجسٹ کی خدمات کافی نہیں، بلکہ ایمرجنسی ڈاکٹرز، نرسز، پیرامیڈیکل اسٹاف، فزیوتھراپسٹس، اسپیچ تھراپسٹس اور بحالی کے ماہرین کو مل کر کام کرنا چاہیے۔ اسی مقصد کے تحت طبی عملے کی تربیت، ورکشاپس اور آگاہی پروگراموں کی ضرورت ہے تاکہ مریض کو اسپتال پہنچنے کے بعد فوری اور معیاری علاج فراہم کیا جا سکے۔انہوں نے پنجاب میں فالج کے مریضوں کے لیے شروع کیے گئے اقدامات کا ذکر کرتے ہوئے کہا کہ بعض مراکز میں اہل مریضوں کو خون کا لوتھڑا تحلیل کرنے والا انجیکشن مفت فراہم کیا جا رہا ہے۔ ایمبولینس سروسز اور طبی عملے کی تربیت بھی اس سلسلے میں اہم ہے، کیونکہ مریض کو درست وقت پر مناسب اسپتال منتقل کرنا علاج کی کامیابی کے امکانات بڑھاتا ہے۔ماہرین نے سرکاری اسپتالوں میں مریضوں کے رش، بستروں کی کمی، طبی عملے پر دباؤ اور ایمرجنسی میں تاخیر پر بھی تشویش کا اظہار کیا۔ ان کا کہنا تھا کہ ہارٹ اٹیک، فالج اور حادثات کے مریضوں کے لیے واضح ترجیحی نظام اور مؤثر ایمرجنسی پروٹوکول ہونے چاہئیں تاکہ انتہائی تشویش ناک حالت میں آنے والے مریضوں کو فوری طبی امداد مل سکے۔ طبی عملے کی تعداد بڑھانے، تربیت بہتر بنانے اور مریضوں کے ساتھ باعزت رویہ اختیار کرنے کی بھی ضرورت ہے۔انہوں نے کہا کہ اسلام آباد اور راولپنڈی کے بعض بڑے اسپتالوں میں فالج کے علاج کی سہولیات دستیاب ہیں، تاہم جدید اسٹروک سینٹرز کے قیام، موجودہ مراکز کو مکمل فعال بنانے اور علاج کی سہولیات کو مزید اسپتالوں تک پھیلانے کی ضرورت ہے۔ ماہرین نے امید ظاہر کی کہ حکومت اور متعلقہ اداروں کے تعاون سے فالج کے مریضوں کو بروقت علاج اور معیاری بحالی کی سہولیات فراہم کرنے میں بہتری آئے گی۔سیمینار کے اختتام پر ماہرین نے اس عزم کا اظہار کیا کہ عوامی آگاہی، طبی عملے کی تربیت، بروقت تشخیص اور جدید علاج تک رسائی بہتر بنا کر فالج کے باعث ہونے والی اموات اور معذوری میں نمایاں کمی لائی جا سکتی ہے۔ انہوں نے میڈیا پر زور دیا کہ وہ فالج کی علامات، فوری طبی امداد اور احتیاطی تدابیر سے متعلق آگاہی عام کرنے میں اپنا کردار ادا کرے۔