ممبران کے بچوں کو فیسوں میں 25 فیصد رعایت دی جائیگی

اسلام آباد () نیشنل پریس کلب اسلام آباد اور اساس اسکولز کے درمیان مفاہمتی یادداشت پر دستخط کی تقریب نیشنل پریس کلب میں منعقد ہوئی۔معاہدے کے تحت نیشنل پریس کلب کے ممبران کے بچوں کو اساس اسکولز میں فیسوں میں 25 فیصد خصوصی رعایت فراہم کی جائے گی۔ معاہدے پر نیشنل پریس کلب کی جانب سے صدر عبدالرزاق سیال اور سیکرٹری ڈاکٹر فرقان راؤ، جبکہ اساس اسکولز کی جانب سے ڈائریکٹر ڈاکٹر ارشد ضیاء نے دستخط کیے۔ اس موقع پر اساس اسکولز کے ڈائریکٹر ڈاکٹر ارشد ضیاء نے کہا کہ ادارہ جدید اور معیاری تعلیم کے ساتھ بچوں کی ذہنی، سماجی اور اخلاقی تربیت پر بھی خصوصی توجہ دے رہا ہے۔ اساس اسکولز میں بچوں کی تعلیمی کارکردگی کے ساتھ ساتھ ان کی صلاحیتوں کا جائزہ لے کر کونسلنگ اور انفرادی رہنمائی کا نظام موجود ہے۔ انہوں نے کہا کہ کمزور کارکردگی دکھانے والے بچوں کو نظرانداز کرنے کے بجائے ان کی مشکلات کی تشخیص کرکے خصوصی معاونت فراہم کی جاتی ہے۔انہوں نے بتایا کہ اساس اسکولز میں بچوں کی اسیسمنٹ کے بعد ان کی تعلیمی، نفسیاتی، رویوں اور دیگر ضروری پہلوؤں کا جائزہ لیا جاتا ہے اور ضرورت کے مطابق ان کے لیے انفرادی تعلیمی منصوبہ تشکیل دیا جاتا ہے، خصوصی ضروریات رکھنے والے بچوں کو بھی مرکزی کلاسز میں شامل کرنے کی کوشش کی جاتی ہے تاکہ ان میں اعتماد اور سماجی میل جول پیدا ہو۔ ڈاکٹر ارشد ضیاء نے مزید کہا کہ ادارے میں جدید ٹیکنالوجی، سائنس، روبوٹکس، مصنوعی ذہانت اور دیگر جدید شعبوں کو نصاب کا حصہ بنایا گیا ہے، جبکہ بچوں کی مستقبل کی تعلیم اور کیریئر کے حوالے سے رہنمائی کے لیے پروفیشنل کیریئر کونسلنگ کا شعبہ بھی کام کر رہا ہے۔ انہوں نے کہا کہ اساس اسکولز کے طلبہ مختلف ملکی و غیر ملکی جامعات میں تعلیم حاصل کر رہے ہیں۔ ڈاکٹر ارشد ضیاء نے مزید کہا کہ نئی نسل کو منشیات اور سگریٹ نوشی جیسی برائیوں سے محفوظ رکھنے کے لیے تعلیمی اداروں میں آگاہی ضروری ہے۔ انہوں نے کہا کہ نیشنل پریس کلب اور اساس اسکولز مل کر سوشل میڈیا کے بچوں پر اثرات سمیت دیگر اہم سماجی مسائل پر پالیسی تجاویز مرتب کرکے حکومت تک پہنچانے کے لیے بھی کردار ادا کرسکتے ہیں، اس موقع پر نیشنل پریس کلب کے صدر عبدالرزاق سیال نے کہا کہ صحافیوں کے بچوں کے لیے معیاری اور قابلِ استطاعت تعلیم کی فراہمی نیشنل پریس کلب کی اولین ترجیحات میں شامل ہے۔ انہوں نے کہا کہ نجی تعلیمی اداروں کی بھاری فیسوں کے باعث صحافی برادری کے لیے بچوں کو معیاری تعلیم دلوانا ایک بڑا مسئلہ ہے، اسی لیے اساس اسکولز کے ساتھ یہ معاہدہ کیا گیا ہے۔ عبدالرزاق سیال نے کہا کہ اساس اسکولز کے تعلیمی ماحول، جدید سہولیات اور معیار تعلیم کا جائزہ لینے کے بعد نیشنل پریس کلب نے اس ادارے کے ساتھ مفاہمت کی ہے۔ معاہدے کے تحت نیشنل پریس کلب ممبران کے بچوں کو نرسری سے اے لیول تک تعلیم حاصل کرنے پر 25 فیصد رعایت دی جائے گی۔انہوں نے امید ظاہر کی کہ اساس اسکولز انتظامیہ صحافیوں کے بچوں کی تعلیم کے ساتھ ساتھ ان کی کیریئر کونسلنگ اور مستقبل کی تعلیمی رہنمائی پر بھی خصوصی توجہ دے گی، تاکہ طلبہ اپنی صلاحیتوں کے مطابق بہتر شعبے کا انتخاب کرسکیں، سیکرٹری نیشنل پریس کلب ڈاکٹر فرقان راؤ نے اساس اسکولز کے ساتھ معاہدہ کرانے میں کردار ادا کرنے پر ضیغم نقوی کا شکریہ ادا کرتے ہوئے کہا کہ اس مفاہمتی یادداشت سے نیشنل پریس کلب کے ممبران اور ان کے بچوں کو معیاری تعلیم کے حصول میں سہولت ملے گی۔ انہوں نے کہا کہ صحافی برادری کے بچوں کے بہتر مستقبل کے لیے اس طرح کے مزید اقدامات بھی کیے جائیں گے۔