اسلام آباد(سٹی رپورٹر)آزاد جموں و کشمیر قانون ساز اسمبلی کے حلقہ نمبر 06 بلوچ، ضلع سدھنوتی سے آزاد امیدوار ملک باسط شریف اعوان نے کہا ہے کہ وہ عوامی خواہش اور مشاورت پر آزاد حیثیت سے الیکشن میں حصہ لے رہے ہیں۔ ان کا کہنا تھا کہ ان کی پریس کانفرنس کسی سیاسی جماعت یا شخصیت کے خلاف نہیں بلکہ عوام کے مسائل اجاگر کرنے اور ان کے حل کے لیے ہے۔نیشنل پریس کلب اسلام آباد میں پریس کانفرنس سے خطاب کرتے ہوئے ملک باسط شریف اعوان نے کہا کہ حلقہ نمبر 06 بلوچ آج بھی بنیادی سہولیات سے محروم ہے اور کئی علاقوں میں سڑکیں، بجلی، پانی، صحت اور تعلیم جیسی بنیادی ضروریات دستیاب نہیں ہیں۔ ان کا کہنا تھا کہ مصنوعی ذہانت اور جدید ٹیکنالوجی کے دور میں بھی اگر عوام بنیادی سہولتوں سے محروم ہوں تو یہ سابقہ نمائندوں کی کارکردگی پر سوالیہ نشان ہے،ملک باسط شریف اعوان نے کہا کہ وہ پہلے ایک سیاسی جماعت کے پلیٹ فارم سے سیاست کر رہے تھے، جہاں انہیں سیاسی عمل اور عوامی خدمت کا تجربہ حاصل ہوا، تاہم عوامی مشاورت کے بعد انہوں نے آزاد امیدوار کے طور پر الیکشن لڑنے کا فیصلہ کیا۔ انہوں نے کہا کہ ان کے نزدیک عوام کی رائے سب سے مقدم ہے۔انہوں نے کہا کہ حلقہ نمبر 06 بلوچ آج بھی بنیادی سہولیات سے محروم ہے اور کئی علاقوں میں سڑکیں، بجلی، پانی، صحت اور تعلیم جیسی بنیادی ضروریات دستیاب نہیں ہیں۔ ان کا کہنا تھا کہ مصنوعی ذہانت اور جدید ٹیکنالوجی کے دور میں بھی اگر عوام بنیادی سہولتوں سے محروم ہوں تو یہ سابقہ نمائندوں کی کارکردگی پر سوالیہ نشان ہے۔ملک باسط شریف اعوان نے الزام عائد کیا کہ ماضی کے عوامی نمائندے وسائل عوام تک پہنچانے میں ناکام رہے، جس کے باعث لوگ اپنے بنیادی حقوق کے لیے سڑکوں پر احتجاج کرنے پر مجبور ہوئے۔ انہوں نے کہا کہ اگر عوام نے انہیں منتخب کیا تو وہ شفاف طرز حکمرانی، عدل و انصاف، ترقیاتی فنڈز کے دیانتدارانہ استعمال، تھانہ کچہری اور تبادلوں کی سیاست کے خاتمے اور عوامی مسائل کے حل کو اپنی اولین ترجیح بنائیں گے۔انہوں نے کہا کہ گزشتہ برسوں میں انہوں نے فلاحی سرگرمیوں کے ذریعے یتیموں، بیواؤں اور مستحق خاندانوں کی مدد کی، متعدد رہائشی مکانات تعمیر کرائے اور عوامی خدمت کا سفر جاری رکھا، جسے آئندہ بھی مزید وسعت دی جائے گی۔ایک سوال کے جواب میں انہوں نے کہا کہ احتجاج ہر شہری کا آئینی حق ہے، تاہم احتجاج ہمیشہ پرامن اور قانون کے دائرے میں ہونا چاہیے۔ انہوں نے کہا کہ سیاسی اختلافات کا حل تشدد نہیں بلکہ ووٹ کی طاقت ہے، اس لیے عوام کو چاہیے کہ وہ اپنے فیصلے بیلٹ باکس کے ذریعے کریں۔انہوں نے کہا کہ آزاد کشمیر میں جاری سیاسی اور آئینی مسائل کا حل مذاکرات، قانون سازی اور جمہوری عمل میں ہے۔ انہوں نے حکومت اور احتجاج کرنے والے گروپوں دونوں پر زور دیا کہ وہ مذاکرات کے ذریعے مسائل کا حل تلاش کریں تاکہ مزید جانی نقصان سے بچا جا سکے۔ملک باسط شریف اعوان نے حالیہ احتجاجی واقعات میں جاں بحق ہونے والوں کے لیے دعائے مغفرت کرتے ہوئے کہا کہ کسی بھی شہری یا اہلکار کی جان کا ضیاع افسوسناک ہے۔ انہوں نے کہا کہ وہ دونوں فریقوں کے درمیان مذاکرات میں کردار ادا کرنے کے لیے بھی تیار ہیں تاکہ معاملات پرامن طریقے سے حل کیے جا سکیں۔انہوں نے دعویٰ کیا کہ حلقے میں رجسٹرڈ ووٹرز کی بڑی تعداد ان کے ساتھ ہے اور انہیں یقین ہے کہ عوام خدمت، دیانت اور کارکردگی کی بنیاد پر فیصلہ کریں گے۔اس موقع پرذوالفقار علی اعوان نے کہا کہ برادری، سیاسی کارکن اور حلقے کے عوام ملک باسط شریف اعوان کے ساتھ کھڑے ہیں۔ انہوں نے کہا کہ ملک باسط شریف اعوان ایک تعلیم یافتہ، باصلاحیت اور باکردار شخصیت ہیں جنہوں نے ہمیشہ عوامی خدمت کو ترجیح دی، اس لیے انہیں حلقے کی نمائندگی کا موقع ملنا چاہیے۔تنظیم الاعوان آزاد کشمیر پاکستان کے رابطہ سیکرٹری شوکت زادہ اعوان نے بھی ملک باسط شریف اعوان کی مکمل حمایت کا اعلان کرتے ہوئے کہا کہ وہ اور ان کے ساتھی ہر سطح پر ان کی انتخابی مہم میں ساتھ رہیں گے اور کامیابی کے لیے بھرپور کردار ادا کریں گے۔