صحافی ڈیجیٹل پلیٹ فارمز پر اپنی پیشہ ورانہ شناخت قائم کریں، فیضان انور

اسلام آباد(سٹی رپورٹر) نیشنل پریس کلب اسلام آباد کے زیر اہتمام اپنے ممبر صحافیوں اور ان کے اہلِ خانہ، خصوصاً بچوں کے لیے فری لانسنگ، مصنوعی ذہانت (AI) اور ڈیجیٹل ذرائع سے آن لائن آمدن کے مواقع سے متعلق ایک خصوصی آگاہی نشست کا انعقاد کیا گیا۔ اس موقع پر آئی ٹی ایکسپورٹ کمپنی ونچرڈ نو میڈز کے چیف ایگزیکٹو آفیسر (سی ای او) فیضان انورنے بطور مہمانِ خصوصی خطاب کیا، اس موقع پر نامور ٹرینرعاطف خان، صدر این پی سی عبدالرزاق سیال،سیکرٹری این پی سی ڈاکٹر فرقان راؤ، نائب صدر بشیر چوہدری سمیت دیگر بھی موجود تھے، مہمانِ خصوصی فیضان انور نے تربیتی سیشن کے شرکاءکو بتایا کہ دنیا تیزی سے تبدیل ہو رہی ہے اور فری لانسنگ، مصنوعی ذہانت اور ڈیجیٹل پلیٹ فارمز مستقبل کی معیشت کا اہم حصہ بن چکے ہیں،انہوں نے زور دیا کہ تبدیلی سے گھبرانے کے بجائے اسے اپنانا وقت کی ضرورت ہے، کیونکہ نئی مہارتیں ہی مستقبل میں کامیابی کی ضمانت ہیں، مصنوعی ذہانت (AI) صحافیوں اور لکھاریوں کے لیے ایک معاون ٹول ہے، جو تحقیق، تحریر، پریزنٹیشن، گرافکس، ویڈیو ایڈیٹنگ اور دیگر تخلیقی کاموں کو زیادہ مؤثر اور تیز بنا سکتا ہے تاہم اصل سوچ، تحقیق، تجزیہ اور تخلیقی صلاحیت ہمیشہ انسان کی ہی رہے گی۔فیضان انورنے سرچ انجن آپٹیمائزیشن (SEO)، کانٹینٹ رائٹنگ، بلاگنگ، یوٹیوب، ویڈیو کانٹینٹ، گرافک ڈیزائن اور دیگر آن لائن شعبوں میں روزگار کے مواقع پر بھی روشنی ڈالی۔ انہوں نے کہا کہ صحافی اپنی تحریری صلاحیتوں کو استعمال کرتے ہوئے ملکی و بین الاقوامی فری لانس مارکیٹ سے خاطر خواہ آمدن حاصل کر سکتے ہیں۔انہوں نے شرکاء پر زور دیا کہ وہ سیکھنے کا عمل جاری رکھیں، جدید ٹیکنالوجی سے خود کو ہم آہنگ کریں اور ڈیجیٹل پلیٹ فارمز پر اپنی پیشہ ورانہ شناخت قائم کریں۔ ان کا کہنا تھا کہ مستقل مزاجی، محنت اور نئی مہارتیں سیکھنے کا جذبہ ہی کامیابی کی اصل کنجی ہے۔تقریب سے خطاب کرتے ہوئے نیشنل پریس کلب کے صدر عبدالرزاق سیال نے این پی سی آمد پرمہمانِ خصوصی کا شکریہ ادا کیا اور کہا کہ پریس کلب اپنے ممبران کی پیشہ ورانہ ترقی اور انہیں جدید تقاضوں سے ہم آہنگ کرنے کے لیے عملی اقدامات کر رہا ہے، صحافی وقت کی اہمیت کو سب سے بہتر سمجھتے ہیں اور پریس کلب اپنے ممبران کو روایتی صحافت کے ساتھ ساتھ جدید ڈیجیٹل مہارتوں سے بھی آراستہ کرے گا تاکہ وہ معاشی طور پر مزید مضبوط ہو سکیں،تقریب کے اختتام پر سوال و جواب کا سیشن بھی منعقد ہوا، جس میں شرکاء نے فری لانسنگ، مصنوعی ذہانت، آن لائن آمدن اور ڈیجیٹل مارکیٹنگ سے متعلق مختلف سوالات کیے، جن کے مہمانِ خصوصی نے تفصیلی جوابات دئیے۔