اسلام آباد()پاکستان کے 79ویں جشنِ آزادی کے حوالے سے نیشنل پریس کلب اسلام آباد میں ایک پروقار اور رنگا رنگ تقریب کا انعقاد کیا گیا، جس میں صحافیوں، ان کے اہلِ خانہ اور مختلف شعبہ ہائے زندگی سے تعلق رکھنے والے افراد نے بڑی تعداد میں شرکت کی۔ تقریب میں ملی نغموں، قومی جذبے اور حب الوطنی سے بھرپور پروگرامز نے شرکاء کے جوش و خروش کو دوبالا کر دیا۔جشنِ آزادی کی تقریب کی مہمانِ خصوصی وزیراعظم یوتھ پروگرام کی فوکل پرسن افنان مشعال تھیں، جبکہ نیشنل پریس کلب کے صدر عبدالرزاق سیال، سیکرٹری ڈاکٹر فرقان راؤ،وزیر اعلیٰ پنجاب کے سابق مشیر ندیم عاشق اعوان، پاکستان انٹرنیشنل ہیومن رائٹس آرگنائزیشن کے چیئرمین ملک حبیب اورکزئی،این پی سی کے سابق صدور فاروق فیصل خان، شہریار خان، سابق نائب صدر این پی سی ڈاکٹر سعدیہ کمال، میاں سہیل اقبال،سید ضیغم نقوی، قیصر مرزا، آر آئی یو جے دستور کے صدر رانا کوثر علی،سینئر صحافی سید محسن رضا،سرفراز راجہ،حسن خان، اشفاق بنگش،راجہ منظور شکرانی، مجاہد بھٹی سمیت دیگر صحافیوں اور ان کے اہلِ خانہ نے بھرپور شرکت کی۔تقریب کے دوران معروف گلوکاروں نے ملی نغمے پیش کرکے فضا کو حب الوطنی کے جذبے سے معمور کردیا۔ دل کو چھو لینے والے قومی نغموں پر شرکاء نے بھرپور داد دی اور پاکستان سے اپنی محبت کا اظہار کیا۔ تقریب میں بچوں اور فیملیز کی بڑی تعداد نے بھی شرکت کی، جس سے جشنِ آزادی کی خوشیوں کو مزید چار چاند لگ گئے۔اس موقع پر مقررین نے پاکستان کی آزادی کے لیے دی جانے والی قربانیوں کو خراجِ عقیدت پیش کرتے ہوئے کہا کہ آزادی ایک عظیم نعمت اور قومی ذمہ داری ہے۔ انہوں نے اس عزم کا اظہار کیا کہ صحافی برادری ملک کی ترقی، جمہوریت کے استحکام، آزادیٔ اظہار اور قومی یکجہتی کے فروغ کے لیے اپنا کردار جاری رکھے گی۔مقررین نے کہا کہ پاکستان لاکھوں قربانیوں کے نتیجے میں معرضِ وجود میں آیا اور نئی نسل کو قیامِ پاکستان کے مقاصد، بانیانِ پاکستان کی جدوجہد اور قومی ذمہ داریوں سے آگاہ کرنا وقت کی اہم ضرورت ہے۔تقریب کے دوران شرکاء نے سبز ہلالی پرچم لہرا کر پاکستان سے محبت کا اظہار کیا اور پاکستان زندہ باد کے نعروں سے ماحول کو گرما دیا۔جشنِ آزادی کی اس خصوصی تقریب کا سب سے خوبصورت اور یادگار لمحہ اس وقت آیا جب رات 12 بجے پاکستان کے 79ویں یومِ آزادی کا کیک کاٹا گیا۔ مہمانِ خصوصی، نیشنل پریس کلب کی قیادت، سینئر صحافیوں اور دیگر شرکاء نے مل کر کیک کاٹا اور ایک دوسرے کو جشنِ آزادی کی مبارکباد دی۔تقریب کے اختتام پر پاکستان کی سلامتی، خوشحالی، ترقی اور استحکام کے لیے خصوصی دعائیں بھی کی گئیں، جبکہ شرکاء نے اس عزم کا اعادہ کیا کہ وطنِ عزیز کی ترقی اور قومی یکجہتی کے لیے ہر ممکن کردار ادا کیا جائے گا۔